ድምፃችን ይሰማ

አዲሱ መጅሊስ የመውሊድን ካርድ መልሶ ለመሳብ እየሞከረ ነው፡፡

አዲሱ የኢህአዴግ እስልምና ጉዳዮች ምክር ቤት (መጅሊስ) በመውሊድ ሰበብ ክፍፍል ለመፍጠርና ድጋፍ ለማሰባሰብ ጥረት እያደረገ መሆኑ ተሰማ፡፡ መጅሊስና አሕባሽ የተነሳባቸውን ከፍተኛ የሕዝብ ተቃውሞ ለማርገብ የተለያዩ ስልቶችን ባለፉት 12 ወራት ይጠቀሙ እንደነበር የሚታወስ ሲሆን ከእነዚህም አንዱ ሱፊያ እና ሰለፊያ የሚሉ ስሞችን በመጠቀም ሕዝበ ሙስሊሙን ለመከፋፈል የሞከሩበት ነው፡፡ ባለፈው ዓመት መውሊድን ታክኮ የቀድሞ መጅሊስ አመራሮች መጠነ ሰፊ እንቅስቃሴ አድርገው የነበረ ቢሆንም ፈጽሞ ሳይሳካላቸው ቀርቶ ነበር፡፡

መጅሊስ በዋነኝነት መውሊድን አድምቆ በማክበር ስም መጅሊሱንና አሕባሽን የሚቃወሙት ወሀቢያዎች እና የመውሊድ ጠላቶች ናቸው የሚል ሐሜት በመንግስት እና በአንድ አንድ ለገንዘብ ባደሩ ሚዲያዎች ሲነዙ እንደነበር የሚታወስ ሲሆን የዚህም ዋነኛ ዓላማ የነበረው የሙስሊሙ አንድነት ስላስበረገጋቸው እና አንድነቱንም ለመሰንጠቅ ነበር፡፡ መጅሊሶች ግን ምንም ሳይሳካላቸው በሀፍረት ተሸማቀቁ፡፡ በወቅቱ መሪዎቻችን ‹‹መውሊድ አይለያየንም›› በሚል ርእስ በአወሊያ እና በሌሎችም መስጊዶች የሰጧቸው ገለጻዎች የሙስሊሙን ልብ ከጫፍ እስከጫፍ አያይዘውት ነበር፡፡ ሙስሊሙ በጋራ ‹‹መውሊድ አይለያየንም›› ሲልም ተደመጠ፡፡

ያለፈውን ዓመት ልምድ በመመርኮዝና የመሪዎቻችን ወህኒ ቤት መሆንን በመመልከት አዲሱ መጅሊስ በመውሊድ ስም ክፍፍል ለመፍጠር ከፍተኛ እንቅስቃሴ እያደረገ መሆኑን ተረድተናል፡፡ መጅሊስ በሚቆጣጠራቸው በተለያዩ መስጊዶች ሕዝቡ ገንዘብ እንዲያዋጣ እየተጠየቀ ሲሆን መዋጮ የማያደርጉም አሸባሪ እና አከራሪ የሚል ታፔላ እየተለጠፈላቸው ይገኛል፡፡ ይህ የመጅሊስ አመራሮች አሳፋሪ እርምጃ ወደየት እያመራ እንደሆነ ለማንም ግልጽ ነው፡፡ እኛ ግን የመጅሊስም ሆነ የመንግስት አካሄድ ገና በጊዜ የተገለጠልን በመሆኑ የመጅሊስ እድሜ ማርዘሚያ የልዩነት አጀንዳዎች እኛ ዘንድ ምንም ቦታ እንደሌላቸው እናረጋግጥላቸዋለን፡፡

አላሁ አክበር!